K9Win Live | ကစားသမားဘဝရဲ့အကောင်းဆုံးအချိန်မှာငွေနောက်လိုက်ခဲ့တဲ့ အော်စကာ ရဲ့လုပ်ရပ်ကမှန်ကန်ရဲ့လား ?

အားကစားသတင်းများ

ကစားသမားဘဝရဲ့အကောင်းဆုံးအချိန်မှာငွေနောက်လိုက်ခဲ့တဲ့ အော်စကာ ရဲ့လုပ်ရပ်ကမှန်ကန်ရဲ့လား ?

November 1, 2024

လူရယ်လို့ဖြစ်လာပြီဆိုရင် လူတိုင်းဟာကိုယ့်လမ်းကိုယ်လျှောက်၊ ကိုယ့်ဘဝကို ကိုယ်တိုင်တည်ဆောက်ကြ၊ ရွေးချယ်ကြရတာ သဘာဝပါပဲ။ ကိုယ်ရွေးတဲ့လမ်းရဲ့ အနိမ့်အမြင့်အတက်အကျကို ကိုယ်တိုင်ခံစားရတာ ဖြစ်တဲ့အတွက် ကိုယ်ရဲ့ ခံယူချက်၊ ရွေးချယ်မှုနဲ့ ဆုံးဖြတ်ချက်သာလျှင်ဘဝအတွက်အဓိကအကျဆုံးပါ။ ဒီနေရာမှာ လူတိုင်းဟာတစ်ယောက်နဲ့တစ်ယောက်ဘဝအခြေအနေတွေမတူညီနိုင်တာမို့ ခံယူချက်၊ ရွေးချယ်မှုနဲ့ ဆုံးဖြတ်ချက် ဆိုတဲ့အရာတွေဟာလည်း ကွဲပြားသွားနိုင်ပြီး အကြောင်းပြချက်ကိုယ်စီနဲ့ ရှိနေနိုင်ကြတာ လည်းသဘာဝပဲဖြစ်ပါတယ်။ ဒါကြောင့်အခြားသူတစ်ယောက်လွတ်လပ်စွာရွေးချယ်တဲ့လမ်းကို မှားလား/မှန်လား သုံးသပ်ကြဖို့ရာ ထိုသူရဲ့ဘဝကိုသင်အရင်းဆုံးနားလည်သိရှိနိုင်မှအဆင်ပြေပါလိမ့်မယ်။ ဒါကြောင့်ဒီနေ့မှာတော့ ချယ်လ်ဆီးအသင်းရဲ့ တစ်ချိန်ကဘရာဇီးကြယ်ပွင့်ကစားသမား အော်စကာရဲ့ ကစားသမား ဘဝအကောင်း ဆုံးအချိန်မှာငွေနောက်လိုက်ခဲ့တဲ့ လုပ်ရပ်က မှန်ကန်ရဲ့လား? ဆိုတဲ့စကားလုံးတွေ အပေါ်မှာ တွေးမြင်နိုင်အောင်တင်ဆက်ပေးသွားမှာဖြစ်ပါတယ်။

အော်စကာ ဆိုတဲ့ဘောလုံးသမားတစ်ယောက်ဟာ ယနေ့ခေတ်လူငယ်လေးတွေမကြားဖူးရအောင်ကို ဘောလုံးဆင်မြင့် ကနေပျောက်ကွယ်သွားတာအချိန်တွေအတော်ကြာခဲ့ပါပြီ။ လက်ရှိအချိန်ထိ ဘောလုံးဆက်ကစားနေသေးပေမဲ့ သူ့ကိုဘယ်သူမှသတိမထားမိကြတော့တဲ့အပြင် သူ့ကစားသမား ဘဝကိုတောင်မေ့လျော့လို့နေခဲ့ပါပြီ။ တစ်ချိန်က ဂန္ထဝင်ကြီး ကာကာ ၊ အိုဇေး တို့လို ကစားသမားကြီးတွေနဲ့ နှိုင်းယှဉ်ခံခဲ့ရတဲ့အထိတောက်ပ ခဲ့တဲ့သူဟာလက်ရှိအချိန်မှာတော့ သာမန်ကစားသမားဘဝနဲ့ဖြတ်သန်းနေရပြီး ဉရောပရဲ့အဝေးတစ်နေရာမှာ ချီးကျူးသံတွေကို ဆုံးရှုံးခဲ့ပြီဖြစ်ပါတယ်။

2012 အိုလံပစ်ကနေစလို့ အော်စကာရဲ့ ကစားသမားဘဝဟာ ဘောလုံးစင်မြင့်ထက်မှာတောက်ပခဲ့ပြီး နေမာ၊ ဟော့တို့နဲ့ တွဲဖက်ကာ ဘရာဇီးရဲ့မျိုးဆက်ကို စိတ်လှုပ်ရှားအောင်လုပ်နိုင်ခဲ့သူတွေဖြစ်ခဲ့ကြပါတယ်။ အဲ့ဒီနောက် ချယ်လ်ဆီးရဲ့ တော်ကောက်ခြင်းခံရပြီး မာတာ၊ ဟာဇက် တို့နဲ့တွဲကာ အော်စကာဟာ ချယ်လ်ဆီးရဲ့ အပြာရောင်ကောင်းကင်ယံမှာလည်း ဆက်လက်ထွန်းလင်းခဲ့ပါတယ်။ ကွင်းလယ်မှာနေရာစုံ ထူးချွန်စွာကစားနိုင်မှု၊ နည်းစနစ်ကြယ်ဝမှု၊ အန္တရာယ်ရှိတဲ့ဘောလုံးလမ်းကြောင်းခင်းကြင်းနိုင်မှုတွေက သူ့ရဲ့ပြောင်မြောက်တဲ့ စွမ်းဆောင်ရည်တွေဖြစ်ပြီး အနာဂတ်မှာသေချာပေါက်အောင်မြင်မဲ့ကစားသမားအဖြစ် အားလုံး ကသက်မှတ်ခြင်းခံရတဲ့သူတစ်ယောက်ပါ။ ဒါပေမဲ့ ကစားသမားဘဝအကောင်းဆုံးအသက်အရွယ် 26 နှစ်အရောက်မှာပဲ အော်စကာ က ဘယ်သူမှမထင်မှတ်ထားတဲ့ ဆုံးဖြတ်ချက်တစ်ခုကို ပြုလုပ်ခဲ့ပြီး ဉရောပရဲ့အဝေး တရုတ်စူပါလိဂ်ဆီပြောင်းရွှေ့ဖို့ အံ့အားသင့်ဖွယ်ဆုံးဖြတ်ချက်တစ်ခုကိုပြုလုပ်သွားခဲ့ပါတယ်။

အဲ့ဒီနောက်ပိုင်း အော်စကာဟာ ဘောလုံးစင်မြင့်ထက်ကနေပျောက်ကွယ်သွားခဲ့ပြီး အောင်မြင်မှုကိုငွေကြေး နဲ့လဲလှယ်ခဲ့တယ်လို့ဆိုတဲ့ ဝေဖန်သံတွေကြားမှာရှင်သန်နေခဲ့ရတာပါ။ဒါပေမယ့်အော်စကာက ဝေဖန်သံတွေကိုရှောင်မသွားပဲသူ့ရဲ့ဆုံးဖြတ်ချက်နဲ့ပက်သက်ပြီး “ တရုတ်စူပါလိဂ်ကိုပြောင်းရွှေ့ခဲ့လို့ကျွန်တော်ဝေဖန်ခံခဲ့ရပါတယ်။ ဘောလုံးသမားဘဝဆိုတာအခြားသော အလုပ်သမားဘဝတွေနဲ့အတူတူပါပဲ၊ ကျွန်တော်တို့လည်း ပိုက်ဆံလိုချင်တာပေါ့၊ ပြီးတော့မိသားစုကို ကူညီချင်တာပဲလေ၊ ကျွန်တော်အရမ်းဆင်းရဲတဲ့မိသားစုကနေလာခဲ့ရတာပါ၊ သူတို့အတွက်ကျွန်တော် ရွေးချယ်ခဲ့တာ၊ ကျွန်တော်ဘယ်မှာကစားမလဲဆိုတာရွေးချယ်ဖို့ အခွင့်အရေးကျွန်တော့မှာရှိပါတယ်။ “ဆိုပြီး အရိုးသားဆုံးဝန်ခံသွားခဲ့ပါတယ်။

အော်စကာရဲ့ ငယ်ဘဝကလည်းသူပြောခဲ့သလိုဘာမှမရှိလောက်အောင်ကိုဆင်းရဲလွန်းခဲ့ပါတယ်။ သူ့အဖေက ယဉ်မတော်တဆမှုနဲ့ သူ့အသက် ( 3 ) နှစ်အရွယ်ထဲကဆုံးပါးသွားခဲ့တာကြောင့် သူတို့မိသားစုကို သူ့ရဲ့အမေ တစ်ဦးထဲက ရပ်တည်နိုင်အောင် ကြိုးစားရင်းနဲ့ဘဝကိုခက်ခဲစွာဖြတ်သန်းခဲ့ရတာဖြစ်ပါတယ်။ သူ့အဖေဆုံးချိန် တုန်းကဆို သူ့အမေမှာကိုယ်ဝန်နဲ့ပါ၊ လူတစ်ယောက်ရပ်တည်ဖို့ ခက်ခဲတဲ့ ဘရာဇီးမှာ သူ့အမေက တစ်ယောက် ထဲအားနဲ့ မောင်နှမ ( 3 ) ယောက်လုံးကို လူတစ်လုံးသူတစ်လုံးရပ်တည်နိုင်အောင် ပြုစုပျိုးထောင်ပေးခဲ့ရတာပါ၊ အားကိုးမရှိတဲ့ သူ့အမေအတွက်အခက်ခဲဆုံးအချိန်တွေလည်းဖြစ်ခဲ့ပါတယ်။ နောက်ပြီးသူ့အမေက ကုမ္ပဏီတွေ မှာလည်းအလုပ် လုပ်နိုင်တဲ့သူမဟုတ်တော့ မိသားစုဝမ်းရေးကို သူတတ်ကျွမ်းတဲ့ မွေးရပ်မြေက အထည်ချုပ်/ရောင်း လုပ်ငန်းလေးနဲ့ ဖြေရှင်းခဲ့ပြီးရုန်းကန်ခဲ့ရတာပါ။ ဒါကြောင့် အော်စကာမှာ သူ့အမေကို အမြဲတမ်းသနားတဲ့စိတ်ကိန်းဝပ် နေခဲ့ပြီး အမေကိုမပူပန်ရတဲ့ ဘဝမှာထားချင်ခဲ့တာ သူအဖြစ်ခြင်ဆုံးဆန္ဒ ဖြစ်ခဲ့ပါတယ်။

တစ်ခါတစ်လေမှာ ကျွန်တော်တို့တွေဟာ ကိုယ်ဖြစ်ချင်တာထက် ဖြစ်သင့်တယ်လို့ထင်တဲ့အရာတွေပေါ်မှာပိုပြီး ဦးစားပေး ရွေးချယ်ကြရပါတယ်။ ကိုယ်ရလာတဲ့အခွင့်အရေးက ကိုယ့်အတွက်ထက် ကိုယ့်မိသားစုနဲ့ပိုပြီး အဆင်ပြေမယ်ဆိုရင် ရွေးချယ်ခဲ့ရတာလည်းသဘာဝပါပဲ။ ဒီအပေါ်မှာ မှားလား/မှန်လား ဆိုတာကတော့ တွေးမြင်သူရဲ့ခံယူချက်အပေါ်မှာသာမူတည်ပါတယ်။ ဘာကြောင့်လဲဆိုတော့ ကိုယ့်ဘဝကဘယ်ကလာလဲ၊ ဘာလဲဆိုတာ ကိုယ်သာအသိဆုံးဖြစ်နေလို့ပါပဲ။

#k9mmmedia

#ShanghaiPort

#Chelsea

#Oscar

Related Sports News