ထွန်းထွန်းမင်းကို 1992 ၊ အောက်တိုဘာ 4 ရက်နေ့ မွန်ပြည်နယ် ၊ ကျိုက်မရောမှာမွေးဖွားခဲ့ပါတယ်။ မိသားစုမှာ ဒုတိယအကြီးဆုံးသားဖြစ်ပြီး သူ့ရဲ့အဖိုးနဲ့ အဖေတို့က လက်ဝှေ့သမားဟောင်းများဖြစ်ကြတဲ့အတွက် သူ့ကို ဒီလောကထဲဝင်ဖို့အကြောင်းဖန်ခဲ့တယ်လို့ပဲပြောရပါမယ်။ သူ့အသက် 6 နှစ်အရွယ်မှာ သူ့အဖေဝယ်ပေးတဲ့ အားကစားပစ္စည်းတွေ သဲအိတ်တွေနဲ့ စတင်လေ့ကျင့်ခဲ့ပြီး သူ့အသက် 9 နှစ်အရွယ် သုံးတန်းကျောင်းသား ဘဝမှာတော့ ကျောင်းကလက်ဝှေ့ပြိုင်ပွဲမှာစတင်ယှဉ်ပြိုင်နေပြီဖြစ်ပါတယ်။ ဒီလိုနဲ့ ငါးတန်းကျောင်းသား အရွယ်မှာတော့ သူ့မိသားစုကိုထောက်ပံ့ဖို့အတွက် လက်ဝှေ့ထိုးဖို့ကိုပဲ ဆုံးဖြတ်ခဲ့ပြီး ကျောင်းကိုအပြီးတိုင်နှုတ်ထွက် လိုက်ပါတယ်။ 2007 နဲ့ 2009 မှာတော့ အပိုဝင်ငွေတွေရရှိဖို့ ထိုင်းကိုရောက်ရှိခဲ့ပြီး ထိုင်းပိုင်ရှင်ရဲ့ နာနတ်သီးခြံမှာအလုပ်လုပ်ခဲ့ပါတယ် ။ အဲ့ဒီကထိုင်းသူဌေးကလည်း သူ့ကို ရွာထဲကမွေထိုင်းဖိုက်တာလေးတွေနဲ့ လက်ဝှေ့ကိုယှဉ်ပြိုင်စေခဲ့ပြီး ထွန်းထွန်းမင်းကပဲ အနိုင်ရလဒ်တွေရရှိအောင်လုပ်ဆောင်နိုင်ခဲ့ပါတယ်။ ဒါပေမဲ့လည်း အခြေအနေအကြောင်းကြောင်းကြောင့် သူက အဲ့ဒီမှာအလုပ်ဆက်မလုပ်ရတော့ပဲ ရွာကိုပဲပြန်ခဲ့ ရကာ မုဒုံသားလက်ဝှေ့ကလပ်နဲ့ စတင်ပူးပေါင်းဖို့ဖြစ်ပေါ်ခဲ့ ပါတယ်။အဲ့ဒီကလပ်ကတော့ ဆရာ ဦးရဲသွေး၊ ဦးသမိန်းသော်တာ နှင့်သူ့အဖေတို့က 2008 မှာစတင်တည်ထောင်ခဲ့တဲ့ ကလပ်လည်းဖြစ်ပါတယ်။

သူ့ဆရာတွေရဲ့လမ်းညွှန်မှုတွေနဲ့ ထွန်းထွန်းမင်းဟာ ဘုရားပွဲတွေ၊ ဘာသာရေးပွဲတွေမှာ လက်ဝှေ့လိုက်ထိုးရင်း ပရော်ဖက်ရှင်နယ် လက်ဝှေ့ကစားသမားဘဝကိုစတင်ဝင်ရောက်လာပါတယ်။ သူ့ရဲ့ကစားဟန်က ရန်လိုတဲ့၊ ပေါက်ကွဲအားကောင်းတဲ့ကစားဟန်ဖြစ်တာကြောင့်လည်း သူဟာလျှင်လျှင်မြန်မြန်နဲ့ကို ကြယ်တစ်ပွင့် ဖြစ်လာခဲ့ပြီး သူ့အတွက်အခွင့်အလမ်းတွေလည်း များစွာရရှိခဲ့ပါတယ်။ အဲ့နောက် သူ့လိုပဲကြယ်တစ်ပွင့်ဖြစ်တဲ့ တူးတူးနဲ့ရင်ဆိုင်ခဲ့ရပြီး သရေ ရလဒ်ထွက်ပေါ်ခဲ့ပါတယ်။ တူးတူးနဲ့ပွဲစဉ်အပြီး 3 ရက်အကြာမှာပဲ ငွေသား 6 သိန်းဖြင့် အဲ့ဒီအချိန်က 2010 ရွှေခါးပတ်ချန်ပီယံ စိုးလင်းဦးနဲ့ထိုးဖို့ကမ်းလှမ်းခံခဲ့ရပြီး သူအဖေရဲ့စီစဉ်မှုဖြင့် သဘောတူလက်မှတ်ထိုးကာ ယှဉ်ပြိုင်ခဲ့ပြီး သရေကျသွားခဲ့ပါတယ်။ အဲ့ဒီအချိန်မှာတော့ သူဟာစိုးလင်းဦးကို ရှိန်သွားခဲ့ပြီး သူတွေ့ဖူးတဲ့ဖိုက်တာတွေထဲမှာ အပြင်းထင်ဆုံး၊ ခံနိုင်ရည်အရှိဆုံး ဖိုက်တာလို့သတ်မှတ်ခဲ့ပါတယ် ။ ဒီလိုနဲ့သူ့ရဲ့ကစားသမားဘဝဟာ လျှင်လျှင်မြန်မြန်တိုးတက်လာခဲ့ပြီး သူက လူကောင်လည်းကြီးတာမို့ အိမ်နီးချင်း ထိုင်းဖိုက်တာတွေ ၊ နိုင်ငံခြားဖိုက်တာတွေနဲ့ပွဲစဉ်တွေ များစွာယှဉ်ပြိုင်ခဲ့ပြီး ချန်ပီယံဖြစ်ဖို့ကြိုးစားခဲ့ပါတယ်။ 2012 နှင့် 2013 မှာလည်း မွေထိုင်းပွဲစဉ်တွေ အာရှအားကစားပွဲတော်တွေ မှာယှဉ်ပြိုင်ခဲ့ပြီး 2019 ၊ မတ်လ 31 မှာတော့ မွေထိုင်းချန်ပီယံ ထိုင်းဖိုက်တာ သနီးလ်လက်ခ် နဲ့တွေ့ခဲ့ပြီး အလဲထိုးဖြင့်အနိုင်ရရှိခဲ့ပါတယ်။ စက်တင်ဘာ 21 ၊ 2014 မှာတော့ သူ့ဘဝရဲ့အကြီးမားဆုံးဆန္ဒကို အကောင်အထည်ဖော်ခွင့်ရခဲ့ပြီး လက်ရှိ ချန်ပီယံစောငမန်းနဲ့ယှဉ်ပြိုင်ကာ အသက် 21 နှစ်အရွယ်မှာပဲမြန်မာ့အလွတ်တန်းချန်ပီယံဖြစ်ခွင့်ရရှိခဲ့ပါတယ်။

လာမဲ့နိုဝင်ဘာ 9 ရက်နေ့ ကရင်ပြည်နယ်နေ့မှာတော့ လက်ရှိချန်ပီယံတစ်ယောက်အဖြစ်လဲ အချို့ ပရိတ်သတ်တွေက သတ်မှတ်ထားကြတဲ့ သွေးသစ်ဝင်းလှိုင်နှင့် 3 ကြိမ်မြောက်တွေ့ဆုံမှုအဖြစ် ယှဉ်ပြိုင် ထိုးသတ်သွားကြမှာဖြစ်ပြီး မြန်မာပြည်ချန်ပီယံလုပွဲအဖြစ်လဲမြင်တွေ့ရမဲ့ပွဲစဉ်လည်းဖြစ်ပါတယ် ။ ပထမတစ်ကြိမ် တွေ့ဆုံမှု TGL အမှတ်ပေးစနစ်နဲ့ပွဲစဉ်မှာတော့ ထွန်းထွန်းမင်းက ရှုံးနိမ့်ထားပြီး ဒုတိယတစ်ကြိမ် တွေ့ဆုံမှု မြန်မာပြည် ချန်ပီယံစိန်ခေါ် ပွဲမှာတော့ ပူးတွဲသရေကျ ရောက်ထားပါတယ်။( ဒီနေရာမှာမှတ်ချက် အနေနဲ့ပြောရရင် TGL ပွဲစဉ်ကအမှတ်ပေးစည်းမျဉ်းနဲ့ယှဉ်ပြိုင်ရတဲ့ ပြိုင်ပွဲဖြစ်တာကြောင့် မြန်မာပြည်ချန်ပီယံ ဆိုပြီးခေါင်းစဉ်တက်မရတာကြောင့်ပါ ) ဒါကြောင့် ဒီပွဲစဉ်က ဖိုက်တာ နှစ်ယောက်လုံးအတွက်အရေးပါတဲ့ ပွဲစဉ်ဖြစ်ပြီး စိန်ခေါ်သူ သွေးသစ်ကပဲအနိုင်ရသွားမလား ၊ အသက်အငယ် ဆုံး မြန်မာ့အလွတ်တန်းချန်ပီယံဆိုတဲ့ ဂုဏ်ပုဒ်နဲ့အခုချိန်ထိရပ်တည်နေသေးတဲ့ ထွန်းထွန်းမင်းကပဲ အနိုင်ရသွား မလားစိတ်ဝင်စားဖို့ကောင်းနေပါတယ်။

#k9mmmedia

#Onechampionship